The Philippines' First All-Opinion Website

Commentary
July 11, 2018

MAYOR HALILI: PINAPA ‘WALK OF SHAME’ ANG MGA DRUG PUSHER

Araw ng lunes, July 2, 2018 sa Flag Ceremony ng Tanauan City hall ng paslangin si Mayor Antonio Halili. Nasa layong 76.8 meters, ang assassin nang paputukan si Mayor.

Isang 5.6 millimeter bullet ang tumama sa kanyang dibdib, sumabog ang bala sa loob ng katawan na dagling kumitil sa kanyang buhay.

“Walk of Shame”

Mayor Halili, Batangas, extra judicial killing, philippines drugs, rey langit

Ito ang bukang bibig sa Tanauan Batangas. Palasak na kataga gamit upang ipahiya ang mga taong nasasangkot sa krimen. Kalimitan rapist, tao na nasasangkot sa pagnanakaw, mga nahuhuling nag tutulak ng pinagbabawal na gamot o droga.

Sa mga hindi pa nakabasa sa ating Column na nai-publish nong taong 2016 at hindi pa nakapanood sa ginawa naming exclusive interview kay Tanauan City, Batangas Mayor Tony Halili, hayaan ninyong ibahagi namin sa inyo ang episode na ito, upang makatulong din na kilalanin ang isang taong na naaakusahan na may kinalaman sa illegal na Droga.

Sa aming TV Program ni JR Langit na KASANGGA MO ANG LANGIT na napapanood tuwing biyernes ng alas diyes ng Gabi sa PTV4 aming ibinahagi sa mga manonood ang special episode na pinamagatan naming “WALK OF SHAME.”

Taong 2016 nang bisitahin ng KASANGGA Team si Mayor Halili sa kanyang tanggapan at amin siyang kinapanayam.

Isa sa nakatawag sa aming pansin ay ang kanyang style ng pag-parada sa publiko ng mga nahuhuling kriminal sa kanyang nasasakupan. Ultimong nagnanakaw ng mga tindang tuyo sa palengke, hanggang sa nang aabuso sa sariling anak at mga may kinalaman sa illegal na droga.

Sinaksihan ng Kasangga Mo Ang Langit o KMAL Team ang pagparada sa mga hinihinalang kriminal ng Tanauan. Marami ang nagtatanong kung epektibo nga ba ang Shame Campaign na ito para sa mga nagkakasala sa batas. Ito nga ba ang tamang paraan sa paglaban sa krimen?

Kumilos ang KMAL Team upang alamin ang puno’t dulo ng Shame Campaign na ito at aming kinapanayam si Mayor Antonio Halili ng Tanauan, Batangas at ilang mamamayan.

KAWATAN NG TUYO

Mayor Halili, Batangas, extra judicial killing, philippines drugs, rey langit

July 2014 nang simulan ni Mayor Halili ang kanyang Shame Campaign sa mga kriminal.

Ang una nyang sinampolan ay ang magnanakaw ng tuyo sa palengke.

Lumabas naman na effective. Mula nang ginawa ni Mayor ang pagparada sa mga nahuli nila, wala nang nangyaring nakawan sa palengke.

Mayor Halili: Kaya nasabi ko na effective nga ‘yung paraan na ‘yun. So, ngayon wala na. Nagpapasalamat na ‘yung mga nagtitinda sa palengke dahil wala nang nakawan.

“Ang bentahan ng shabu parang nagbebenta ng asin. Hindi tinatago dahil walang iniiwasan. Hindi takot sa pulis kasi noong panahong ‘yun, pati pulis kasama, patong sila.”

Buo ang paniniwala ni Mayor Halili na tama lang ang kanyang ginagawang pagpapahiya upang maturuan ng liksyon ang mga gumagawa ng hindi mabuti.

Pinilit din naming maghanap ng biktima ng krimen sa Tanauan upang maibalanse ang aming ginagawang episode. Pinalad naman kaming maka-interview ng isang kapatid ng dalawang menor de edad na inabuso ng sariling ama.

DEATH THREATS

Mayor Halili: Noong ako’y manalo bilang mayor, ang sabi ko, sisimulan ko na agad ang campaign against illegal drugs. Sabi ko nga, kung ako ay matatakot, wala na, isu-surrender ko na ang buong bayan ko.

Kaya naman katakutakot na death threat ang dumarating sa akin.

Jr Langit: Ano naman ang naging tugon ninyo sa mga death threat sa inyo?

Mayor Halili: Eh, hindi naman ako nagpatakot. Ang sabi ko, bahala kayo. Galingan niyo, gagalingan ko rin. Eh, syempre ilang tao na ang pinapatay dito. Judge dito, pinapatay. Pulis dito, pinapatay. PDEA Agent dito, pinapatay. SWAT pinapatay. Powerful na nga e. Masyado nang walang takot ‘yang mga ‘yan. Kung ako pa ang matatakot, eh wala na ang bayan na ito.

Flores de pusher ang tawag nila sa mga nasasangkot sa Droga. At mayroon daw silang malakas na ebidensya laban sa suspect na kanilang ipinaparada sa kalsada.

HUMAN RIGHT’S ISSUE

Tinanong ng ating kasanggang Jr Langit kung ano ang kasunod pagkatapos iparada ang mga suspects sa lansangan?

Mayor Halili: Pagkatapos ng Walk of Shame, ibinibigay namin ang suspect sa mga pulis para masampahan ng kaso.

Marami ang bilib sa istilong ito ni Mayor Halili sa pagresolba sa krimen, subalit mayroon din naman ang nagagalit dahil ito raw ay paglabag sa karapatang pantao ng mga suspek.

Jr Langit: Mayor, ano naman po ang masasabi niyo sa mga hindi pabor sa Shame Campaign dahil human rights violation daw po ‘yun?

Mayor Halili: ‘Yung mga human rights, human rights na ‘yan! ‘Di niyo na inisip kung ako ay inyong idedemanda. Idemanda niyo lahat ng mga TV Stations na nagpaparada ng mga kriminal. Nagbabalandra ng mga mukha ng mga sinasabing nagnakaw ng PDAF at may kasong Plunder. Convicted na ba si Revilla nung nilagay sa TV screens ng mga TV Stations? Si Jinggoy, ‘yung mga nacha-charge? Kung ako ay idedemanda ng CHR, dapat siguro unahin niyo muna ‘yung malalaki. Kayong mga taga-CHR kayo, nakakahiya kayo! Magpa-examine muna kayo, baka may mga sira ulo ninyo!

Dama namin na may kimkim siyang hinanakit sa CHR o Commission on Human Rights sa pag puna sa kanyang style. At walang kagatol-gatol na sinabi niyang dapat din magpatingin sa utak ang mga ito na pumupuna sa kanyang ginagawang pagparada sa mga kriminal.

Kanyang katwiran: wala namang naitutulong ang mga human rights sa mga biktima ng pang-aabuso at pagnanakaw. At dito niya nasambit na kung may idedemanda, dapat daw ay ang mga himpilan ng telebisyon na nag lalabas nang mga mukha ng mga suspect na yan kahit wala pang final judgement sa kanilang mga kaso.

Inihalimbawa pa ni Mayor Halili si Mayor Joseph Estrada noong inilabas ng media ang kanyang mug shots na iba’t ibang anggulo habang hawak hawak ang numiro na tulad ng isang bilanggo.

Sa kabila ng imbestigasyon sa kaniya ng Commission on Human rights, hindi natitinag si Mayor Halili at handa pa siyang sumugal sa Shoot to Kill order kapag hindi raw naging epektibo ang Walk of Shame.

DIYALOGO SA MGA PUSHER

Ayon pa sa Mayor, gumagamit sila ng kamay na bakal laban sa kriminalidad sa kanilang nasasakupan upang huwag nang lumaganap pa ang krimen.

Mayor Halili: Hindi kasi mapatigil ng ibang paraan, e huhulihin mo – makukulong. Pagka maya-maya, nakalabas na. Nagpipiyansa. Balik na rin sa kanilang trabaho.

Pero si Mayor Halili ay hindi natitinag sa mga imbestigasyon at pagtuligsa sa kanyang ginagawang pagparada sa mga hinihinalang criminal.

Tunay ngang kakaiba ang istilo ni Mayor sa paglaban sa krimen: ini-imbitahan pa nya ang mga pinaghihinalaang drug pushers sa isang diyalogo.

Tinatanong niya kung ano ang gusto nilang style, tulad ba ng kay Mayor Osmena na pag babarilin ang mga pusher at bibigyan ng pabuya ang makababaril o bigyan ng pagkakataon na makapag bagong buhay muna?

Inuulit ulit niya sa diyalogo kung meron pang intensyon ang mga ito na magbago.

SUMMATION

Sa mga ganitong pagkakataon, ang dapat nating bigyan ng higit na pagpapahalaga ay ang makabubuti para sa mas nakararaming mamamayan. Ang pagpuksa sa kasamaan ay kasama sa tungkulin ng mga nakatataas na opisyal. Ang dapat ding bantayan ay ang pagmamalabis, at may malaking papel din ang mga sibilyan sa Tanauan, Batangas sa pagresolba ng krimen sa kanilang bayan.

Ngayong nawala na ang crusader, sino ang aako at magpapatuloy sa kanyang krusada. Mayroon bang maglalakas ng loob na ituloy ang iniwanan ni Mayor Antonio Halili o ipauubaya na lamang ang lahat sa agos ng tubig at ihip ng hangin?

 

Facebook Comments
Share and Follow Us:

Photo/s used in this post is/are covered under the Fair Use Exemption of the IP Code.

By posting a comment in the section provided, you hereby agree to:
  • You acknowledge that Manila Speak is only a platform for your views and opinions and those views and opinions of yours are not necessarily that of Manila Speak.
  • The comments section is a public forum and you will be considerate and respectful at all times.
  • You shall not post any defamatory utterances, profanity or vulgar language, anything that is obscene or abusive. You shall not post any false statements, harassing words or threaten a person’s safety or property.
  • You shall not, without consent, post any personal information such as but not limited to phone numbers and email or mailing addresses.
  • You shall not violate other’s intellectual property or proprietary rights.
  • Manila Speak may or may not review your post but it reserves the right to remove that same if such post may potentially violate the guidelines.
  • All Rights Reserved. No portion of this site may be republished without permission of the publisher.

 


 

Speak Your Mind


Social media & sharing icons powered by UltimatelySocial